VIGAN CITY – Awan ti namnama a mawaya-wayaan ni dati a Calauan, Laguna Mayor Antonio Sanchez iti pagbaludan ta nakaru dagiti krimen a sangsanguenna.
Segun kenni dati a mangidaulo ti Presidential Commission for the Urban Poor Atty. Terry Ridon iti pannaki-uman ti Bombo Radyo Vigan, saan nga ita wenno inton sumaruno a lawas wenno bulan no diketdi mabayag pay nga agtalinaed iti pagbaludan ni Sanchez ta saan a kwalipikado a benepisyaryo ti Republic Act 10592 wennu Good Conduct Time Allowance Act gapu dagiti krimen nga inaramid na.
Malaksid iti kaso a pammapatay ken panagrames, adda pay iti kaso na inaig iti iligal a droga ta idi nasukimat iti nakaibaludan na ket adda dagiti naala dagiti otoridad nga iligal a droga a nakaidulin kadagiti naduma-duma nga alikamen na iti uneg ti pagbaludan.
Maibasar iti nasao a linteg, no agpakita iti nasayaat a galad iti uneg iti pagbaludan, bumassit iti tiempo iti pannakabalud dagiti napili a benepisyaryo ngem inlawlawag ni Ridon nga adda dagiti nakailanad nga exemption na.
Kabayatanna, para ken ni Atty. Ferdinand Topacio iti pannaki-uman met laeng ti Bombo Radyo Vigan, masapul a maadal a naimbag iti pannakawaya-waya ti dati a mayor gapu kadagiti krimen nga inaramid na.
Innayon na a nu ar-arigen ket saan pay nga umdas iti pannakaibalud ti dati a mayor ti dua pulo ket lima a tawen ta kaasi dagiti pamilya nga inulila dagiti dua a pinatay na.
