VIGAN CITY- Kaso a panaglabsing ti Republic Act 8293 wennu Intellectual Property Code of the Philippines ken panaglabsing iti municipal tax code iti ili a Santa iti maipila kontra kada John Paulo Lopez Caranto kenni Jerome Corpuz Lopez nga agpada nga agtawen iti dua pulo ke tallo nga agnaed idiay San Pascual, Talavera, Nueva Ecija a natiliw iti entrapment operation idiay Mabilbila Sur, Santa ta mapapati nga agilaklako da ti peke a sigarilyo.
Segun ken ni Police Chief Inspector Rodel Del Castillo, hepe ti Santa municipal police station, nakemmeg dagiti suspek babaen iti panagipulong ni Raymond Bringas a maysa nga akin-kukua ti sari-sari store a nalakoan da ti peke a sigarilyo.
Dagiti suspek ket nakalugan iti tricycle ken dagiti lako da a sigarilyo ket naka-rim, agpapada ti serial number na ken inbaga da nga ingapu da idiay probinsiya ti Abra.
Naala kadagiti suspek iti maysa a rim ti sigarilyo a nagserbi a purchased item ken tallo a piraso iti sangagasut a pisos a naaramat iti entrapment operation, sabali laeng dagiti sangagasut ket pito a rim ti naduma-duma a brand ti sigarilyo a naala iti uneg ti tricycle a nagluganan da.
