VIGAN CITY – Sapsapulen pay laeng dagiti kameng ti linteg ti kadua dagiti dua a mapapati a miyembro ti Daga- Daga termite Gang a nakemmeg da idiay Barangay Bitalag ken Las-ud, Tagudin idi naminsan nga aldaw.
Dagiti nakemmeg a suspek ket isu da Jonathan Mangliw kenni Dumaliw Banagen nga agpada a taga – Tabuan, Bessao, Mt. Province.
Segun ken ni Police Chief Master Sergeant Joseph Jimeno ti Tagudin municipal police station, parbangon iti September 16 idi nabati ni Robert Jimeno iti cellphone na iti uneg iti tricycle na ket idi sublyan nan, awan metten iti nangikabilan na.
Ti dayta a kanito, adda iti nadlaw na a mapagduduaan nga FX nga aglikmo-likmot iti lugar isu a nagpatulong kadagiti agpatpatrolya a barangay official.
Idi pinasardeng dagiti agpatpatrolya a barangay official iti lugan, rimuwar dagiti dua ket insigida a nagtaray da ket gapu iti dayta, tinengngel da met ti maysa a nabigbig a ni Jonathan Mangliw tapnu saan a makataray.
Nakita iti uneg ti lugan ti cellphone iti tricycle driver a mapukpukaw ken dagiti naduma-duma nga alikamen dagiti termite wennu tunnel gang kas ti acetylyne tank, super kalan tank, hydraulic jack ken hand grenade.
Idi naipan idiay police station ni Mangliw, nangisayangkat iti hot pursuit operation dagiti otoridad agingga a nasalamaan da dagiti dua a kadua na idiay Barangay Las -ud, Tagudin a nabbasa ken pitak-pitak, isu a kinemmeg da ida ngem ti maysa ket nakalibas manen isu a ni laeng Dumaliw Banagen iti nakemmeg ket naala iti ikot na ti maysa pay a granada.
Kinumpirmaran met ti Tagudin PNP nga awan pay iti nabiktima wennu target nga establisyimento dagiti suspek ngem isuda dagiti akin-aramid dagiti panagtakawan idiay Tagudin ken idiay Sta. Cruz.
