VIGAN CITY – Nakemmeg ti wanted person a maibilang a Top 10 Provincial Level a ni Noel Ramos, agtawen iti duapulo ket walo a taga-Brgy. Monitan, Gonzaga, Cagayan babaen ti panagtitinnulong ti Suyo Police Station, Tabuk City Police Station, Kalinga Police Provincial Office ken dadduma pay nga otoridad .
Ti pannakakemmeg ni Ramos ket babaen ti bileg ti warrant of arrest nga inruar ni Hon. Judge Emmylou Valois Rubang Mangasar Acting Presiding Judge, RTC First Judicial Region, Branch 25 Tagudin, Ilocos Sur a napetsaan idi January 19, 2022 gapu ti kaso na a panaglabsing ti 3 counts nga Special Protection of Children Against Child Abuse, Exploitation and Discrimination Act.
Nailatangan isuna ti pyansa nga aggatad ti 400,000 pesos ket naipan iti RHU Tabuk City Kalinga para ti medical examination ngem itan ket addan iti Suyo Municipal Police Station.
Kabayatanna, nakemmeg ni Marito Tacardson, agtawen iti limapulo ket dua, agnanaed idiay Brgy. San Pablo, Sto Domingo ken Top 1 wanted person iti Municipal Level gapu ti panbaglabsing na iti Special Protection of Children Against Child Abuse, Exploitation & Discrimination Act (Anti-Child Abuse Law) iti Section 5 B babaen ti bileg iti warrant of arrest nga inparuar ni Hon. Leah Agripina Ramirez Florendo, Acting Presiding Judge of RTC Branch 20, Vigan City a napetsaan idi Pebrero 9 iti agdama a tawen.
Addan ti suspek iti kustodiya ti pannakabagi ti linteg kalpasan a naidalan ti medico legal examination idiay Magsingal District Hospital ket nailatangan ti pyansa nga aggatad ti 400,000 pesos.
