VIGAN CITY – Dua ti nakemmeg babaen iti bileg ti warrant of arrest iti maysa nga ili ken siudad iti probinsia nga Ilocos Sur.
Idiay Barangay Cabaritan, Sto. Domingo a nakemmeg ni Rolando Pescador, agtawen iti limapulo ket lima, government employee, agnaed iti Pantay Laud, Vigan City ngem agtaltalinaed idiay Barangay Cabaritan.
Sumangsango ni Pescador iti kaso a Falsification of Public Document a ti warrant of arrest-na ket imparuar ti Presiding Judge, MTCC Vigan City, napetsaan iti June 20,2022.
Nairekomendar ti tallopulo ket innem a ribo a pisos a pyansa para ti temporaryo a pannaka-wayawayana.
Kabayatanna, idiay Barangay Ayusan Norte, Vigan City met a nakemmeg ni Patricio Cabuenas Reoliquio, agtawen iti limapulo ket dua nga agnaed iti Barangay Mindoro, Vigan City.
Kaso a panaglabsing iti Section 5 ti Republic Act 9262 wenno Violence Against Women and their Children ti sangsangwen ni Reoliquio a ti warrant of arrest-na ket imparuar ni Presiding Judge Regional Trial Court, First Judicial Region Branch 20, Vigan City, napetsaan iti April 24, 2013.
Sangapulo ket dua a ribo a pisos ti nairekomendar a pyansa ti akusado para ti temporaryo a pannaka-wayawayana.
