VIGAN CITY – Nakemmeg idiay Sta. Lucia, Narvacan ti maysa a wanted person a Top 5 iti Provincial Level ti Bataan babaen iti bileg ti warrant of arrest.
Nabigbig ti suspek a ni Bryan Anthony Quito, agtawen iti duapulo ket maysa a taga-Nanguneg West, Narvacan ken sumangsango iti kaso a rape.
Imparuar ni Judge Ma Lourdes Eltanal-Ignacio, Presiding Judge ti RTC Third Judicial Region Branch 5 Dinalupihan City, Bataan ti warrant of arrest ti suspek a napetsaan iti February 8, 2020.
Kabayatanna, idiay Cabaroan, San Emilio ket nakemmeg ni Roy Dangidang, agtawen iti limapulo ket siam, karpentero a taga-Naguimba, Banayoyo, Top 1 most wanted person ti municipal level babaen met laeng ti warrant of arrest.
Panglabsing iti Republic Act 9262 wenno Violence Against Women and Their Children Act ti kaso a sangsangwen ti suspek a ti warrant of arrest-na ket imparuar ni Judge Fatima Vitamog-Querubin, Acting Presiding Judge ti RTC Branch 22, Narvacan a napetsaan iti April 23, 2021.
Nakakustodian kadagiti pannakabagi ti linteg dagiti dua a suspek tapno dumalanda iti husto a proseso.
