VIGAN CITY – Dua a wanted person ti nakemmeg kadagiti dua nga ili iti Ilocos Sur babaen iti bileg ti warrant of arrest.
Nakemmeg idiay Barangay Burgos, Sta. Lucia, Ilocos Sur ni Mark Eduard Laña Halover, agtawen iti duapulo ket walo, delivery rider, taga-Barangay Ronda, Sta. Lucia.
Sumangsango ni Halover iti kaso a Qualified Theft a ti warrant of arrest na ket napetsaan iti June 10, 2024, nailatangan iti PHP40K a pyansa para iti temporaryo a pannaka-wayawayana.
Kabayatanna, idiay met Barangay Callaguip, Caoayan, nakemmeg ni Nelson Aquino Tugade, agtawen iti uppat a pulo ket pito.
Sumangsango ni Tugade iti kaso a panaglabsing iti Republic Act 10883 wenno New Anti Carnapping Act of 2016, napetsaan ti warrant of arrest-na iti June 10, 2024.
Nailatang ti PHP400K a pyansa para iti temporaryo a pannaka-wayawayana.
Nakakustodian dagiti dua nga akusado kadagiti police station iti lugarda sakbay ti pannakaiturn-overda iti korte.
