VIGAN CITY – Dua a wanted person ti nakemmeg babaen iti nagsaruno nga operasyon iti Ilocos Sur ken idiay Metro Manila.
Idiay Aurora Boulevard, Kaunlaran, Quezon City, Metro Manila, nakemmeg ni James Gargabaite Lewiden Jr., agtawen iti uppat a pulo ket tallo, agent ti travel and tour for tourist visa, taga-Barangay Paltoc, San Emilio, Ilocos Sur.
Ni Lewiden Jr., ket sumangsango iti tallo a bilang ti Qualified Rape a napetsaan iti June 3, 2024, awan ti nailatang a pyansana.
Ti warrant of arrest na ket imparuar ti Family Presiding Judge ti Family Court, First Judicial Region Branch 9, Narvacan, Ilocos Sur nga inyemplementar met ti San Emilion Municipal Police Station.
Ditoy met probinsia kangrunaan idiay Barangay Luna, Burgos, Ilocos Sur, nakemmeg ni Jehnel Guzman Dato, agtawen iti tallopulo ket lima, construction worker, agnaed iti nasao a lugar.
Sumangsango iti kaso a Frustrated Murder ken nailatangan iti pyansa a PHP200K.
Ti warrant of arrest na ket inruar ti Presiding Judge ti Branch 22, First Judicial Region, Narvacan, Ilocos Sur.
Dagiti nakemmeg ket addan iti kustodia dagiti kapulisan tapno dumalanda iti husto a proseso.
