VIGAN CITY – Dua ti nakemmeg babaen iti bileg ti warrant of arrest manipud kadagiti dua nga ili iti probinsia.
Immuna a nakemmeg idiay Barangay San Jose, Narvacan ni Christian Raymond Sala, agtawen iti tallopulo ket uppat, seaman nga agnaed iti nasao a lugar.
Sumangsango ti akusado iti dua a bilang iti panaglabsing ti RA 9262 ken nailatang ti pitopulo ket dua a ribo a pisos a pyansa para ti pannaka-wayawayana.
Ti warrant of arrest na ket inruar ti Presiding Judge ti RTC Br 9 Family Court, Narvacan.
Idiay met Barangay Barangobong, Sta. Lucia a nakemmeg ti maysa a menor de edad a taga-Morente Vill, Pinamalayan, Oriental Mindoro ngem agdama nga agnaed iti Barangay Barangobong.
Sumangsango ti nasao a menor de edad iti tallo a bilang iti kaso a panaglabsing iti Anti-Photo and Video Voyeurism Act of 2009 ken nailatangan iti duapulo a ribo a pisos ti kada bilang ti kaso para ti temporaryo a pannaka-wayawayana.
Ti warrant of arrest na ket inruar ti Acting Presiding Judge, RTC, First Judicial Region, Branch 20, Vigan City.
