VIGAN CITY – Agpapalaingen dagiti tallo a naaksidente idiay Brgy. Daclapan, Cabugao ken dagiti uppat menor de edad a naglugan kadagiti dua a traysikel.
Karaman iti aksidente da Arthur Raquedan, agtawen iti limapulo ket walo, mannalon ken ti pasaherona a ni Myleen Raquedan, agtawen iti limapulo ket innem nga agnaed iti nasao a lugar.
Ti traysikel a nakadinnungparna ket minaneho ni Edwin Solis, agtawen iti limapulo ket siam a taga-Sitio Lubong Danao, Brgy. Dardarat, Cabugao a nangilugan kadagiti uppat a menor de edad.
Iti pannaki-uman ti Bombo Radyo Vigan ken ni P/Capt. Franco Catalan, agpapadaya ti maysa a traysikel idin ta linisyanna dagiti nalubak a paset ti dalan ket nasagidna ti maysa a traysikel a nakasinnabetna ket naitapwak iti kataltalunan.
