VIGAN CITY – Dua ti nakuryente idiay Brgy Pangada, Sta Catalina ken nabigbig ida a da Edmar Norberte , agtawen ti tallo pulo ken ni Bobby Norberte nga agtawen ti lima pulo nga agpada nga agnanaed idiay Barangay Poblacion, Caoayan.
Segun ken ni Police Chief Master Sergeant Archie Aniput, reliever investigator ti Sta. Catalina municipal police station, agsimsimpa dagiti biktima ti steel bar iti beam iti maikadua a kadsaaran ti mabangbangon a pagtagilakoan a kukua ti maysa a sangguniang bayan member iti ili idi nakuryente dagiti dua.
Iggem ni Bobby ti maysa a steel pipe ta simsimpaen da iti beam iti mabangbangon a pagtagilakoan idi aksidente a naisagid iti ungto ti steel pipe iti live wire, isu a nakuryente ket nairaman ni Edmar ta ig-iggaman na iti beam a simsimpaen da.
Naitaray iti ospital dagiti dua ngem napalubusan a nagawid ni Edmar ta minor injuries laeng iti sinagaba na idinto a ni Bobby ket nagsagaba iti first degree burn iti luppo na isu nga insingasing ti doktor a mai-confine tapnu naan-anay a mataming.
