Dua a tattao, nakemmeg gapu ti sugal iti ili ti Sinait

VIGAN CITY – Dua ti nakemmeg a nagsugal iti naiwayat nga Anti-Illegal Gambling operation idiay Barangay Katipunan, Sinait.

Nabigbig dagiti suspek a da Bonifacio Concepcion Saclayan, agtawen iti innem a pulo ket pito ken ni Ossier Luga Taguinod, agtawen iti uppat a pulo ket tallo, agpada a taga-Barangay Lydia, Marcos, Ilocos Norte.

Naaktuan dagiti suspek nga agaayam iti Lucky 9 iti maysa a natayan ket naala kadakuada ti baraha, tugaw, lamisaan, pusta a PHP3,673, uppat a pulo ket dua a chips ken maysa a blanket.

Iti agdama, addan iti kustodia dagiti pannakabagi ti linteg dagiti suspek tapno sangwenda ti kaso a panaglabsing iti Presidential Decree 1602 wenno ti Anti-Illegal Gambling Act.