VIGAN CITY – Binallaagan ni Alrico Favis, dati a mayor iti ili ti Magsingal ken agdama nga Executive Assistant to the Mayor dagiti agbambantay kadagiti quarantine facility gapu kadagiti naka-quarantine a naglibas.
Iti pannaki-uman ti Bombo Radyo Vigan ken ni Favis, saan nga inyuray dagiti nurse iti Rural Health Unit a nakaduty dagiti sumukat kadakuada a kameng ti Bureau of Fire Protection nga agbantay ket ginundawayan dagiti naka-quarantine ti rimuar ken napan gimmatang iti maysa a paglakuan idiay Sta. Monica.
Inlawlawag ti opisial nga awan ti sakit dagiti naka-quarantine kadagiti pasilidad iti nasao nga ili nga umabot ti pitopulo ket innem ti bilangda ken impasiguradona a nainget ti panangipatungpalda kadagiti protocol.
Malaksid iti dayta, ingunamgunamna a kaykayatna a mapaawid ditoy probinsian dagiti kalugaranda ta dumalanda met iti usto a proseso imbes a marigrigatanda kadagiti lugar nga ayanda.
