VIGAN CITY – Naipilan idi malem ti Miyerkules iti kaso a murder kontra kada Rollie John Bringas nga agtawen iti sangapulo ket siyam a taga- Quezon District, Santa kenni Harvee Sedantes nga agtawen iti dau pulo ket maysa a taga- Pasungol, Santa ta isuda dagiti suspek nga immuna nga innaganan iti agtawen iti sangapulo ket innem a testigo iti pannakapalek ti pimmusay a biktima a ni Rodolfo Kristan Pancho II idi parbangon ti July 7 idiay Marcos District, Santa.
Segun ken ni Police Lt. Jerry Arzabal, hepe ti Santa municipal police station, ti immuna a testimonya ti testigo iti nagibasaran da iti panangipila da iti kaso ngem manarimaan pay laeng iti naun-uneg nga imbestigasyon da inaig iti nasao a banag nangruna ket adu met dagiti rumrumwar a damag nga adda pay iti sabali a grupo a posible nga akin-aramid iti krimen.
Immunan a pinaglibakan dagiti dua a suspek nga isuda iti akin-aramid iti krimen ta segun ken ni Bringas ket idi naggapu isuna iti trabaho na, nakita na ti biktima ken ti testigo a magmagna iti igid iti kalsada ngem awan pay iti napasamak idi ken ti biktima idinto a ni Sedantes met ket inbaga na a matmaturog idi isuna iti pagtaengan da ken nabayagen a saan da a nagkadua ken ni Bringas isu nga awan iti ammo na iti napasamak.
Kabayatanna, itatta July 20 nga aldaw a maitabon ti biktima ket hustisya latta iti kiddaw ti pamilya na.
