VIGAN CITY – Dua a suldado ti natay, maysa ti nadunor idinto a dua ti nadunor idiay Barangay Gacab, Malibcong, Abra gapu ti panang-ambush kadakuada dagiti tropa ti New People’s Army bayat ti panagturongda a tumulong koma iti Disaster Response Team kalpasan ti magnitude 6.7 a gingined a nangdayyeg manen iti nasao a probinsia idi October 25, malaksid pay ti magnitude 7 a dimmayyeg idi July.
Iti pannaki-uman ti Bombo Radyo Vigan ken ni Lt. Col. Ricardo Garcia III, commander ti 24th Infantry Battalion, naggapu dagiti suldado a nakasibilian iti kampoda ta nabilinda a mapan iti advance command post-da idiay Baay Licuan.
Bayat ti panagturongda iti nasao a lugar babaen ti inaramatda a motorsiklo ken kurong-kurong, dimmagasda iti water point tapno uminom nga isu met ti nangpasungadan kadakuada dagiti agdakdakiwas a siam kameng ti KLG-North Abra a nangambush kadakuada.
Numan pay adda met armas dagiti suldado ket kinuna ni Garcia a napaspas ti pasamak.
Dua ti “killed in action” wenno insigida a natay gapu ti pasamak – maysa ti taga Ilocos Sur ken maysa met ti taga-Cagayan, idinto a dua ti nakalemmeng ngem agpadada a nadunor.
Kinondenar ni Lt. Col. Ricardo Garcia III, commander ti 24th Infantry battalion ti inawaganna a barbaric act dagiti Communist Terrorist Group ken impasiguradona kadagiti umili kangrunaan ti pamilia dagiti suldado a sapulenda dagiti nangpatay kadakuada ken ipaayda ti hustisia.
