VIGAN CITY – Balligi ti pannakaiwayat ti search warrant operation iti uneg ti pagtaengan ni Ernesto Ciubal, agtawen iti innem a pulo ket siam a taga-Barangay Dinalaoan, Narvacan.
Ti search warrant kontra ti suspek ket inruar ti hues iti RTC Branch 72 Narvacan gapu ti panaglabsingna iti Republic Act 10591 wenno ti Illegal Possession of Firearms and Ammunition Act a napetsaan iti July 13, 2022.
Nasarakan dagiti pannakabagi ti linteg iti pagtaengan ti suspek ti maysa a homemade caliber 22 revolver nga addaan iti tallo a piraso ti live ammunition ken maysa a magazine assemby para iti Carbine Rifle nga addaan iti lima a piraso ti live ammunition.
Malaksid dayta, naiwayat pay ti search warrant operation iti pagtaengan ni Pedro Fontawa, agtawen iti innem a pulo ket dua a taga-Sitio Mangaan, Barangay Pangotan, Sugpon.
Ti search warrant ti suspek ket inruar ti RTC Branch 25, Tagudin a napetsaan iti July 13.
Naala manipud iti pagtaengan ni Fontawa ti maysa a caliber 38 revolver wenno PALTIK nga addaan iti dua a live ammunition, walo a piraso ti live ammunition para iti caliber 38 ken tallo a piraso ti live ammunitio para iti caliber 22.
Addan iti kustodia ti Sugpon Municipal Police Station ti suspek pakairamanan dagiti naala kenkuana nga ebidensya.
