VIGAN CITY – Balligi ti pannakaiwayat ti search warrant operation kadagiti dua nga ili iti probinsia gapu iti panaglabsing iti Republic Act 10591 wenno ti Comprehensive Firearms and Ammunition Act.
Immuna a naiwayat ti operasyon idiay Sitio Bay-asan, Barangay Naguimba, Banayoyo a nakakemmegan ti suspek a ni Aurelio Abalos, agtawen iti innem a pulo, mannalon nga agnaed iti nasao a lugar.
Naala iti uneg ti pagtaengan ti suspek ti maysa a unit ti caliber 9mm Beretta Pistol ken pito a live ammunitions.
Idiay met ti Sitio Mata, Barangay Marozo ket nakemmeg ni Jonathan Sabalo, agtawen iti tallopulo nga agnaed iti nasao a barangay.
Naala iti uneg ti pagtaengan ti suspek ti maysa a unit ti home made shotgun, tallo a piraso ti sangapulo ket dua a gauge ti live ammunition, duapulo a piraso ti 5.56 mm ammunition, lima a piraso ti caliber 45 ammunition, uppat a piraso ti caliber 22 ammunition, dua a piraso ti 9mm ammunition, pito a piraso ti caliber 38 ammunition ken maysa nga Smith and Wesson Springfield caliber 38 revolver.
Dagiti naala nga ebidensya manipud kadagiti dua nga operasyon ket nakakustodian iti police station ti lugarda para iti proper disposition.
