VIGAN CITY – Dua a residente iti dua a barangay iti ili ti Tagudin ti nasarakan nga awan ti biagna gapu ti pannaka-atakeda.
Iti uneg ti comfort room ti Tagudin Parish Church idiay Barangay Rizal ket nasarakan nga awan ti biagna ni Vicente Javier Somera, agtawen iti limapulo ket siam.
Iti inisyal nga imbestigasyon, linukatan ni Gilbert Embocado Jornacion, agtawen iti limapulo ket dua, drayber ken maintenance ti Tagudin Parish Church a taga-Barangay Salvacion ti comfort room ti simbaan idin ta nakitana a nakadasay ni Somera.
Natakuatan a ti biktima ket agtaltalinaed iti uneg ti simbaan ta isu ti imbilangna a maikadua a pagtaenganna ken nayos-ospital idin gapu ti hypertension.
Kabayatanna, idiay met Barangay Garitan ket nasarakan nga awan ti biagna ni Ervin Ladia, agtawen iti duapulo ket innem.
Alas singko iti agsapa idi kalman ket nakariing ni Henry Hernando, agtawen iti walopulo ket walo idin ta nasarakanna ti apona nga awan ti biagnan iti salas ti pagtaenganda.
Insigida a nagresponde dagiti kameng ti Tagudin Police Station kadagiti nasao a pasamak ken nakikammayetda iti Rural Health Officer a ni Dr. Arianne Lyra Pacho a nangideklarar a dead on the spot kadagiti dua a biktima.
Nupay kasta, saanen nga immannugot ti pamilia dagiti dua a biktima a maidalan iti autopsy dagiti bangkayda.
