Umabot iti P200,000 ti gatad dagiti dua a pugon a nauram idiay Barangay Cabcaburao, Burgos, Ilocos Sur.
Kukua daytoy ni Loreto Dato Bolante, agtawen iti limapulo ket dua, agnaed iti nasao a lugar.
Nakaawat ti Burgos Police Station iti tawag manipud iti maysa a concerned citizen a mangipakpakaammo nga adda maur-uram iti lugar kangrunaan iti pugon.
Iti pannaki-uman ti Bombo Radyo Vigan ken ni Senior Fire Officer 3 Archival Patao, mapapati a nabaybay-an ti panagluto dagiti akinkukua iti pugon ken ambuligan ti naaramat a pagsungrod.
Adda idiay Barangay Manaboc ti akinkukua nga agal-ala kadagiti nagango a tabako idinto a ti asawana a ni Baby Ann Bolante ket pinanawanna ti pagtaenganna idi napasamak ti uram.
Immabot iti uppat a pulo a minutos ti uram ken nadepdep babaen kadagiti kameng ti Bureau of Fire Protection-Burgos ken ti tulong ti BFP-Sata. Maria iti alas dyes kinse iti malem.
Awan met ti nadangran iti napasamak nga uram.
