VIGAN CITY – Dua a dakkel a plastic bag nga agdagsen amin iti 3 kilograms ti nasarakan ti maysa a mangngalap iti karayan a sumilpo iti kabaybayan ti Barangay San Pedro, Narvacan, Ilocos Sur.
Nabigbig ti mangngalap a ni Bartolome Soria Cabero, agtawen iti innem a pulo, agnaed iti nasao a lugar.
Magmagna ni Cabero iti igid ti karayan idin ta nakitana dagiti dua a plastic bag a naglaon iti puraw a powder a tumtumpaw.
Insigida met a tinawaganna ni Barangay Kagawad Angelito Cañero agingga a naidanun kadagiti pannakabagi ti linteg gapu iti atapda a daytoy ket iligal a droga.
Ti maysa a plastic bag ket agdagsen iti 1.2 kilograms nga adda markana a JJD-DMCD-1 idinto a ti maysa ket agdagsen iti 1.8 kilograms nga adda markana a JJD-DMCD.
Iti agdama, naikustodian dagiti nasarakan a white powder iti Narvacan Police Station para iti naan-anay nga imbestigasyon.
