Nadunor dagiti dua a naglugan iti maysa a traysikel kalpasan a matukbobna ti likudan a paset ti maysa a bus iti Abra-Narvacan Road iti Barangay Bannuar, San Juan, Ilocos Sur.
Ti drayber ti bus ket lalaki nga agtawen iti limapulo ket siam idinto a ti met traysikel ket minaneho ti lalaki nga agtawen iti tallopulo ket siam.
Dagiti met naglugan iti traysikel ket residente iti Magsingal ken Abra.
Agpapa-abagatan ti bus ken nakasardeng iti lugar bayat a naka-hazard lights ken nakapuesto iti sidewalk idin ta bigla a tinukbob ti traysikel nga agpapa-abagatan met laeng.
Gapu iti kapigsa ti impact, nakaro a dunor ti sinagrap dagiti dua a naglugan iti traysikel idinto a saan met a naan-ano ti drayber ken dagiti inlugan ti bus.
Napitpit ken nagasgasan ti kannigid a paset iti likudan ti bus idinto a napittak ti sidecar ti traysikel.
Rimmuar pay iti imbestigasyon a mapapati a nakainom ti drayber ken ti inlugan ti traysikel.
