VIGAN CITY – Nadundunor dagiti dua a participant iti Boss Ironman 2023 gapu iti pannakaidungparda iti maysa a kotse idiay Brgy. San Nicolas, San Esteban, Ilocos Sur.
Iti pannaki-papatang iti Bombo Radyo Vigan ken ni PMaj. Aurelio Manantan iti San Esteban Municipal Police Station, dagiti karaman iti aksidente ket da Michael Reyes Puno Jr., agtawen ti tallopulo ket pito, naasawaan, contractor nga agnaed idiay 1131 iti Del Pilar St. Cabanatuan Nueva Ecija a driver iti BMW 1250 motorcycle; ni John Michael Anthony Mercado Raguin, agtawen ti tallopulo, baro, call center agent, nga agnaed idiay B5L30 Cattleya, Homes Pag-asa II, Imus Cavite a driver iti Bristol Venturi 500 motorcycle; idinto a ti nagmaneho ti puraw a Toyota Corolla Altis ket ni Nilo Gacula Galvez, agtawen ti innem a pulo ket dua nga agnaed idiay Brgy. Calaoan, Candon City.
Segun ken ni Manantan, makita iti CCTV footage nga immagaw ti linya ti driver ti kotse a gappuanan ti pannakaidungpar dagiti dua a nagsaruno a motorsiklo a minaneho da Puno ken Raguin.
Inlawlawag ti driver ti kotse a naiirap isuna iti silaw nga inaramat dagiti dua a nagmotorsiklo isu a nagpatingnga ket immagaw pay iti linya.
Nagsagaba iti dunor iti nadumaduma a paset ti bagi ni Puno ket nafracture iti likodna isu nga agtaltalinaed pay laeng iti ospital; ni Raguin ket napilay iti sakana idinto saan a naan-ano ni Galvez a driver ti kotse ket naipan latta iti ITMC, Candon City para iti medical examination.
VC – PMAJ. AURELIO MANANTAN 1
Impalagip ni Manantan kadagiti amin a motorsita iti kinapateg ti gears tapno aniaman iti mapasamak ket saan unay a nakaru ti sagabaen ngem nasaysayaat latta nu kanayon nga agannad iti panagmaneho para iti kinatalged.
VC – PMAJ. AURELIO MANANTAN 2
