VIGAN CITY – Dua a pagtaengan ti nayyanud idinto nga adda pay maysa nga alanganin ti kasasaadnan idiay Barangay Nagtupacan, Sta. Maria, Ilocos Sur nga epekto iti mapaspasaran a madi a paniempo gapu iti habagat.
Iti pannaki-uman ti Bombo Radyo Vigan ken ni Acting Mayor Michael Florendo, gapu iti pannakayyanud dagiti pagtaengan, dagus a nagresponde ti Municipal Disaster Risk Reduction and Managament ket naibakwit dagiti pamilia ken kimmamang kadagiti kabagyanda.
Iti agdama, walo a barangay ti apektado iti madi a paniempo a buklen iti 387 a pamilia, katukad iti nasurok sangaribo a tattao.
Naituding ti pannakaited dagiti hygiene and sleeping kits kadagiti evacuees.
Manarinamaan met ti panangvalidate-da no mano iti gatad dagiti nadadael iti biang ti agrikultura.
