VIGAN CITY – Boluntaryo a simmuko idiay Bantay municipal police station ni Ben Pablico, agtawen ti lima pulo ket uppat nga agnaed idiay Boquig, Bantay a nawaya-wayaan idi June 8 iti agdama a tawen gapu ti Good Conduct Time Allowance kalpasan a nakonbiktaran iti kaso a murder ken naibalud idiay New Bilibid Prison.
Mapatta-patta a dua pulo ket pito a tawen iti pannakaibalud ni Pablico idiay NBP ket iti agdama, maisagsaganan iti pannakaisubli na idiay Bureau of Corrections kalpasan iti isusuko na.
Kabayatanna, boluntaryo met laeng a simmuko idiay Vigan City police station ni Timoteo Racoma nga agtawen ti innem a pulo ket pito nga agnaed idiay Paratong, Vigan City a nakonbiktaran iti kaso a murder ken mapatta-patta a tallo pulo a tawen a naibalud idiay New bilibid Prison ngem nawaya-wayaan idi February 27 iti agdama a tawen gapu met laeng ti GCTA.
Da Pablico kenni Racoma ti dua kadagiti nakurang dua ribo a nakonbiktaran kadagiti nakam-ames a krimen ngem nawaya-wayaan da gapu ti GCTA a kayat ni Presidente Rodrigo Duterte a maisubli da iti pagbaludan ta ma-re-evaluate da tapnu maamuan nu kwalipikado da ti GCTA law wennu saan.
