VIGAN CITY – Natalged a nakapag-emergency landing ti Cessna 152 Aircraft idi alas tres y media ti malem idi kalman idiay Barangay Pilar, Sta Cruz.
Segun kenni PCapt. Roger Baling-Oay a hepe ti Sta Cruz Municipal Police Station, adda iti nangipakammo kadakuada a nag-emergency landing ti Cessna Plane a naggapo ditoy syudad a mapan koma idiay Binalonan, Pangasinan idi nagkaproblema iti makina iti aircraft iti panagtayabna ket nag-emergency landing iti igid iti baybay idiay Pilar, Sta Cruz.
Nabigbig ti piloto ti nasao a cessna plane a ni Miguel Franco Tubasis, agtawen ti dua pulo ket walo, baro, Flight Instructor ti WCC Aviation, Binalonan, Pangasinan nga agnaed idiay Barangay Tranchera, Tayug, Pangasinan kadua ti student pilot na a ni Ramielle Cycle Deltran, agtawen dua pulo ket maysa, nga agnaed idiay 126, Manibaug, Libutad, Porac, Pampanga.
Malaksid a natalged dagiti nakalugan iti nasao a cessna plane, awan pay iti nakita a dadael iti aircraft.
