VIGAN CITY – Agpada a nadunor ti ulo ken nagasgasan ti bagbagi dagiti dua a nagmotorsiklo gapu iti agsaruno a pannakaaksidenteda idiay Barangay Cacadiran, Cabugao, Ilocos Sur idi kalman February 18, 2024.
Ti nagmaneho ti color black a Honda Click 125 motorcycle ket ni Jomar Calderon Aquino, agtawen iti tallopulo ket pito, naasawaan, construction worker, awanan ti driver’s license nga agnaed idiay Barangay Cabaroan, Sta. Maria idinto a ti nagmaneho ti color red a Honda Click 125 motorcycle key ni Jhon Paul Lupredo Talla, agtawen iti duapulo ket dua, baro, construction worker, awan ti driver’s license-na nga agnaed idiay Barangay Aragan, Cabugao.
Iti pannaki-uman ti Bombo Radyo Vigan ken ni PMaj. Ramil Llarenas, Officer in Charge iti Cabugao Municipal Police Station, naggapu a naki-inninom ni Aquino ket bayat ti panagdalyasatna iti agsikko a paset ti nasao a barangay ket naaksidente.
Segun ken ni Llarenas, idi naamoan ni Talla ti napasamak ken ni Aquino ket nagturong iti nasao a lugar ket idi nakitana nga adda sinagabana a dunor ket impadasna iti nagayab ti kakaduana isu a nagmaneho iti motorsiklona ngem isu metten ti pannakaaksidentena ta naawanan ti kontrol ti manibelana.
Gapu dayta, agpada a nadunor iti ulo ken bagbagi dagiti driver isu a naipanda iti Pira Hospital, Cabugao para ti pannakatamingda.
Kinuna pay ni Llarenas a naka-inom ken awanan ti lisensya idi nagmaneho dagiti dua isu a naticketanda.
Gapu ti pasamak, impalagip ni Llarenas kadagiti umili a saan nga agmaneho nu awan iti lisensya ken saan nga agmaneho nu awan iti protective helmet.
VIDEO – PMAJ. RAMIL LLARENAS
