VIGAN CITY – Nadundunor dagiti dua a nagmaneho ti motorsiklo gapu ti panagdinnungparda iti Barangay Road idiay Barangay Salindeg, Vigan City iti 11:55PM idi June 1, 2024.
Iti pannaki-uman ti Bombo Radyo Vigan ken ni PLt. Col. Rogelio Remiendo Jr. manipod Vigan City Police Station, ti nagmaneho ti nangisit a motor star ket maysa a menor de edad nga agnaed idiay Barangay IX, Vigan City idinto a ti nagmaneho ti nangisit a Honda Beat motorcycle ket ni Louie Raposas Rosario, agtawen iti tallopulo ket maysa, construction worker, addaan driver’s license nga agnaed idiay Barangay San Pedro Sur, Vigan City.
Segun ken ni Remiendo, agpapadaya a direksyon ti menor de edad idinto nga adda iti bangir a linya ni Rosario idi nadanonda iti nasao a lugar ket nagdinnungparda iti tingnga ti kalsada a gappuanan ti pannakadunor iti nadumaduma a paset ti bagida isu a naipanda iti Ilocos Sur Provincial Hospital – Gabriela Silang para ti pannakatamingda.
Gapu ti pasamak ket balakad ni Remiendo kadagiti nagannak a saan a palubosan dagiti annak nga agmaneho nangruna nu saan a nakalisensya ken naka-inom iti arak tapno maliklikan ti aniaman nga aksidente a mabalin a pakairamanan.
VIDEO – PLT. COL. ROGELIO REMIENDO JR
