VIGAN CITY – Natay ti maysa a painter a nagmotorsiklo idinto a kritikal ti lalaki a nagmotorsiklo met laeng ta nagdinnungparda iti national highway idiay Barangay Paing, Bantay, Ilocos Sur.
Segun ti Bantay Municipal Police Station, ti nagmaneho ti nangisit a Honda TMX a motorsiklo ket ni Rowel Calilan Pelayo, agtawen iti tallopulo ket pito, naasawaan; ken ti backriderna a ni Jelson Boy-Agon Jacinto, agtawen iti tallopulo ket walo, baro, awanan trabaho nga agpada nga agnaed idiay Barangay Quimmarayan, Bantay idinto a ti nagmaneho ti nangisit a Yamaha Mio Sporty motorcycle ket ni Jeffrey Soria Pagatpat, agtawen iti tallopulo ket walo nga agnaed idiay Barangay Balaleng, Bantay.
Agpapadaya a direksyon da Pelayo idinto nga adda iti bangir a linya ni Pagatpat idin nadanonda iti nasao a lugar ket kellaat nga immagaw ti linya ni Pagatpat a rason iti panagdinnungparda.
Naipan pay laeng ni Pelayo iti Northside Doctors Hospital babaen kadagiti nagresponde a PDRRMC personnel ngem naideklarar a dead on arrival babaen ti attending physician-na.
Ti met driver ti mio a ni Pagatpat ket naipan iti Metro Vigan Hospital para iti pannakatamingna ngem kritikal ti kasasaadna idinto a ti back rider ni Pelayo ket naipan iti Ilocos Sur Provincial Hospital – Gabriela Silang ta nagsagaba iti minor injuries iti agduduma a paset iti bagina.
