VIGAN CITY – Agpada a nadundunor dagiti dua a driver iti motorsiklo gapu iti panagdinnungparda idiay Brgy. Poblacion Sur, Sta. Maria.
Segun ti Sta. Maria Municipal Police Station, dagiti karaman iti aksidente ket da Louie Jake Quicho, agtawen iti duapulo ket tallo, naasawaan, staff clerk iti Savemore nga agnaed idiay Brgy. Balogang, Burgos a nagmaneho iti Magenta Yamaha Mio 125 ken ti nagmaneho ti nalabbaga a Honda TMX 155 motorcycle ket ni Jay-R Cabonce, agtawen iti tallopulo ket walo, baro, laborer idinto a ti kinalubbonna ket ni Jason Evangelista, agtawen iti tallopulo ket pito, naasawaan, construction worker, agpada nga agnaed idiay Brgy. Namruangan, Cabugao.
Iti inisyal nga imbestigasyon, agturong iti bagatang a direksyon ni Quicho a nakalugan ti mio motorcyle idinto nga agpapadaya a direksyon ni Caboncea nakalugan iti TMX 155 motocycle idin nagdinnungparda.
Dunor iti naduma-duma a paset iti bagi iti sinagaba dagiti driver nga agpada a naipan iti Ilocos Sur District Narvacan babaen kadagiti nagresponde a PNP personel ken LGU-Sta. Maria para iti pannakatamingda ket naamoan a positiboda a naka-inom iti nasanger kas pinasingkedan ti attending physician-da a ni Dr. Winnie Valdez.
Nupay kasta saan a naan-ano ti backrider a ni Evangelista, kabayatan a saan pay nga ammo nu mano ti gatad ti nadadael a paset iti lugan gapu iti nasao nga insidente.
