VIGAN CITY – Agpada nga agpapaagas iti Ilocos Sur Provincial Hospital – Gabriela Silang dagiti dua a naglugan iti kurong-kurong kalpasan iti pannakaidungparda iti maysa a traysikel iti Barangay Road idiay Barangay Anonang Menor, Caoayan.
Ti nagmaneho iti Honda TMX 125 tricycle wenno kurong-kurong ket ni Joe Daryl Corpuz Bautista, agtawen iti tallopulo ket dua, baro, karpentero idinto a ti kaduana ket ni Jun-jun Javier Abad, agtawen iti tallopulo ket lima, baro, construction worker nga agpada nga agnaed idiay Anonang Menor, Caoayan.
Iti pannaki-uman ti Bombo Radyo Vigan ken ni PCapt. Medel Perinion a hepe iti Caoayan Municipal Police Station, bayat iti panagturong iti daya a direksyon ti kurong-kurong ket aksidente a nasagidda iti traysikel a nakaparking babaen ti akin-igid a pilid iti lugan.
Segun kenkuana, naawanan ti kontrol ti manibela ti driver ti kurong-kurong isu a naidungpar iri kongkreto a pader a gappuanan ti pannadundunorda isu a naipaagasda iti ospital.
Mapapati a naka-inom dagiti dua a nagkalugan iti kurong-kurong idi napasamak iti aksidente.
Nupay kasta, makisaritanto pay laeng dagiti otoridad iti akin-kukua iti traysikel a nasagid tapno mapagpapatangan dagiti rumbeng a maaramid.
AUDIO – PCAPT. MEDEL PERINION
