VIGAN CITY – Nadunor dagiti nagkalugan iti motorsiklo ta natukbobda iti maysa nga electric bike iti national highway idiay Barangay Balaleng, Bantay.
Ti nagmaneho iti Yamaha Mio 125 motorcycle a matte blue ket ni Jayson Palcong Rapin, agtawen iti uppat a pulo ket innem, naasawaan, addaan ti professional driver’s license; ken ti back rider-na a ni Marilyn Tabbuan Rapin, agtawen iti uppat a pulo ket lima, naasawaan nga agpada nga agnaed idiay Barangay Busiing Censur, San Ildefonso idinto a ti nagmaneho iti 4-wheels electric bike ket ni Samson Revives, agtawen iti innem a pulo, naasawaan, mannalon nga agnaed idiay Barangay Bahet, San Ildefonso.
Iti pannaki-uman ti Bombo Radyo Vigan ken ni PMaj. Pol Areola a hepe iti Bantay Municipal Police Station, agpada nga agpapabagatan a direksyon dagiti dua a lugan a ti akinsango ket iti e-bike idinto a sumarsaruno iti nagkalugan ti motorsiklo nga agpada a nakahelmet.
Segun kenkuana, nagsikko ti e-bike a sumrek iti Alta Mira Subdivision isu a natukbob iti nagmotorsiklo a gappuanan ti pannakadundunor dagiti nagkalugan.
Gapu dayta, agpada a nadunor dagiti nagkalugan ti motorsiklo ngem ti back rider ket naipan iti Northside Doctor’s Hospital ken naiyakar iti Ilocos Sur Provincial Hospital – Gabriela Silang para iti pannakatamingna idinto a saan a naan-ano ti nagmaneho ti e-bike.
Nagpalagip ni Areola kadagiti amin a motorista iti panagan-annad ken agbalin a disiplinado nangruna nu adda iti kalsada tapno saanen a maulit pay iti kas iti nasao a pasamak.
VIDEO – PMAJ. POL AREOLA
