VIGAN CITY – Agpada a natay dagiti nagkalugan iti motorsiklo ta aksidente a nadungpar ida ti maysa a pick-up iti natonal highway idiay Sitio Pideg Barangay Magsaysay District, Santa, Ilocos Sur.
Segun ti Santa Municipal Police Station, ti nagmaneho ti Honda Beat a color black ket ni Mirasol Peria Tacanay, agtawen iti duapulo ket siam, technician iti CJ Feeds nga agnaed idiay Barangay Cabalanggan, Bantay; ken ti back ride na a ni Ciriaco Dodiongan Tacloban Jr., agtawen iti tallopulo ket uppat, delivery boy; idinto a ti nagmaneho ti Nissan Navarra a color red ket ni Arsenio Azcueta Car, agtawen iti limapulo ket lima, naasawaan nga agnaed idiay Barangay Ambulugan, Narvacan.
Agpapaamianan a direksyon ti motorsiklo idinto nga agturong iti bangir a linya ti pick-up idin nadanonda iti nasao a lugar ket nabtak ti pilid iti pick-up isu a naidungpar iti motorsiklo.
Gapu iti kapigsa iti impact, nagsagaba ti dunor iti nadumaduma a paset ti bagi ti nagmaneho ti motorsiklo isu a naipan iti Ilocos Sur District Hospital Narvacan ngem naideklarar a natay idinto a ti back ride na ket nagsagaba met laeng iti dunor iti nadumaduma a paset ti bagina isu a naipan iti Metro Vigan Cooperative Hospital ngem naideklarar met laeng a natay.
Nupay kasta, saan a naan-ano ti nagmaneho ti pick-up ngem naipan iti Santa Municipal Police Station para iti documentation ken proper disposition.
