VIGAN CITY – Nadundunor dagiti dua a naglugan ti motorsiklo gapu iti pannakatukbobda iti maysa a SUV iti national highway idiay Cabalanggan, Bantay, Ilocos Sur.
Segun ti Bantay Municipal Police Station, nabigbig ti nagmaneho ti motorisiklo a ni Raymark Alcain Piano, agtawen ti duapulo ket tallo, baro nga agnaed idiay Naguiddayan, Bantay ken ti kinalubbonna a ni Valerie Tacuycuy idinto a ti nagmaneho iti Toyota Innova SUV ket ni Emilio Gines Ayson, agtawen ti limapulo ket siam, naasawaan, Principal nga agnaed idiay San Rafael, San Esteban.
Maibasar iti inisyal nga imbestigasyon, agpada nga agpapalaud a direksyon ti motorsiklo ken SUV a ti adda iti sangwanan ket ti SUV isu nga idi bigla a nagpreno ket natukbob iti motorsiklo.
Gapu ti dayta, nagsagaba iti dunor ti nadumaduma a paset ti bagi dagiti nagkalubbon ti motorsiklo a nakaaramat ti helmet ngem naipanda iti Northside Doctor’s Hospital, Bantay para iti pannakatamingda idinto a saan a naan-ano ti driver ti SUV ken kakaduana.
