VIGAN CITY – Dua ti nadangran kalpasan a natukbob ti motor iti maysa a Fuso 10 wheeler Cargo Truck idiay Brgy. Suso, Sta Maria.
Nabigbig ti drayber ti Yamaha Nmax 155MVC a ni Kimberly Custodio, agtawen iti duapulo ket dua, maysa a sales agent nga agnaed ti Brgy Talogtog, Candon City ken kinalubbonna a ni Jennifer Gallardo, agtawen iti duapulo ket tallo a taga-Brgy. Paypayad, Candon City.
Ti inisyal nga imbestigasyon, agpada dagiti lugan nga agpapaabagatan a direksyon idi nagsignal a nagovertake ti motor ngem saana a natansya ti kapaspasana isu a naidungpar iti likodan a paset ti truck a nangitunda iti panakadisgrasyada.
Gapu dayta, nadunor iti makikannigid nga ima ti drayber ti NMAX kasta payen ti backrider-na.
Insigida a naipanda iti ospital para ti naan-anay a pannakatamingda idinto nga amamwen paylaeng dagiti otoridad nu mano gatad dagiti nadadael a paset ti lugan.
