VIGAN CITY – Dunor ti ulo ken nadumaduma a paset iti bagi iti sinagaba dagiti nagkalubbon ti motorsiklo a natnag iti diversion road idiay Brgy. Ayudante, Candon City.
Segun ti Candon City Police Station, ti nagmaneho iti nalabbaga a motorsiklo ket ni Richard Gadingan, agtawen ti duapulo, baro, awanan trabaho nga agnaed idiay Brgy Patpatta Primero, Candon City idinto a ti kinalubbonna ket ni Bernard Austria, agtawen iti limapulo ket maysa, naasawaan, mannalon nga agnaed idiay Brgy. Vical, Sta. Lucia.
Sakbay iti insidente ket limmabas ti nasao a lugar ni Ronald Gadia, agtawen iti uppat a pulo ket lima, naasawaan, mannalon nga agnaed iti Brgy. Parioc Primero, Candon idi napansinna dagiti dua a lallaki a nakaiddan iti daya a paset iti diversion road idinto a natnag iti motorsikloda iti abot iti daya a paset ti lugar.
Iti imbestigasyon, naamuan a naggapu iti laud a direksyon ti motorsiklo nga agpapadaya a direksyon idin naabotda iti agsikko a paset iti kalsada ket naglabes ti driver a gappuanan ti pannakapukawna iti kontrol iti manibela isu a natinnagda iti abot.
Gapu ti sinagaba a dunor ket naipan iti Candon Hospital ni Austria idinto a Gadingan ket iti Reasonable Hospital para iti pannakatamingda.
