VIGAN CITY – Naipaagas iti ospital dagiti nagkalubbon iti motorsiklo gapu ti pannakadisgrasyada idiay Barangay Casilagan, Sta. Cruz.
Nabigbig dagiti biktima a da Julito Santa, agtawen iti uppat a pulo ket maysa, furniture shop owner, nagmaneho iti Honda Click 125 a motorsiklo ken ti backrider-na a ni Gilbert Beltran, agtawen iti sangapulo ket walo, 1st year college student, agpada a taga-Barangay Dacutan, Tagudin.
Nakaawat iti tawag ti Sta. Cruz Police Station manipud ken ni Barangay Captain Eduardo Quiming a mangipakpakaamo nga adda ti nadisgrasya iti nasao a lugar ket idi nagrespondeda, nasarakanda ti maysa a Honda Click 125 a motorsiklo ken ti maysa a Rusi a motorsiklo nga adda iti tengnga ti national highway.
Basar iti pakpakauna nga imbestigasyon, sakbay ti pasamak, nagiinom ti suspek a ni Romar Barnachea, agtawen iti tallopulo ket maysa, vulcanizing technician a taga-Barangay Casilagan, Sta. Cruz nga akinkukua iti vulcanizing shop, kaduana da Charly Sario Cagaanan, agtawen iti duapulo ket maysa, aglaklako iti ikan, ken ti maysa pay a menor de edad a kaduada idiay Barangay Paratong, Sta. Cruz.
Bayat ti panagiinomda, rimsua ti nabara a saritaan a nangitunda iti riri agingga idi nangala ti suspek iti metal pipe ket siurotna ti dua a kaduana.
Nupay kasta, napan ti atensyon ti suspek iti nasao a Rusi a motorsiklo a mapapati a dinadaelna babaen ti nasao a landok sa impanna iti tengnga ti national highway, a nadungpar met iti simmungad a Honda Click a motorsiklo.
Nagsagaba dagiti biktima iti dunor iti ulo ken bagida isu a naipaagasda iti Ilocos Sur District Hospital Sta. Lucia para ti naan-anay a pannakatamingda.
