VIGAN CITY – Kaso a panaglabsing iti Republic Act 10591 wenno Comprehensive Firearms and Ammunition Act ti sangwen ti maysa a lalaki idiay Brgy. Fuerte, Caoayan babaen iti naiwayat a search warrant operation.
Nabigbig ti suspek a ni Angelino Llanes Games Jr., agtawen iti uppat a pulo ket siam, tricycle driver a residente ti nasao a lugar.
Iti pannaki-uman ti Bombo Radyo Vigan ken ni Bombo Radyo Vigan ken ni P/Maj. Henry Garcia, hepe ti Caoayan Police Station, dua a bulan a sipsiputandan ti suspek gapu ti ilemlemmengna a saan a rehistrado a paltog ket idi napaneknekanda nga adda iigal nga aramidna ket insigida nga inpakatanda iti search warrant nga imparuar ni Judge Jaime Bugain, Acting Presiding Judge ti First Judicial Region 3rd Municipal Circuit Trial Court Caoayan-Sta. Catalina a napetsaan iti January 27, 2021.
Naala manipud iti pagtaengan ti suspek ti maysa a caliber a paltog nga awan balana, maysa a homemade 5.56 mm, innem a bala ti caliber 38, sangapulo ket uppat a bala ti M16 rifle, maysa a magasin para ti caliber 22 nga adda iti walo a balana ken sabali pay a magasin para ti caliber 22 nga adda pito a balana pakairamanan ti green shoulder bag.
Kabayatanna, idiay ili ti Narvacan ket balligi met laeng ti pannakaiserbi ti search warrant kontra ken ni Rowena Molina, agtawen iti tallopulo ket lima a taga-Dasay, Narvacan gapu met laeng ti iligal a panagikotna iti paltog.
Iti pannaki-uman ti Bombo Radyo Vigan ken ni PCapt. Arcadio Viloria, adda dagiti concerned citizen a mangidandanun iti iligal nga aramid ti suspek ken pinasingkedan ti suspek a ti paltog ket kukua pay laeng daydi amada.
Naala iti pagtaengan ti suspek ti maysa a unit ti Squires Bingham 12 Gauge nga itan ket addan iti kustodia ti Narvacan Police Station para ti proper disposition idinto a ti suspek ket mapilaanen iti kaso.
