VIGAN CITY – Dua iti nakemmeg gapu iti panagay-ayamda iti tong-its idiay Shelter Ville, Brgy. San Julian Norte, Vigan City.
Dagiti naglabsing ti Presidential Decree 1602 ket da Francisco Ancheta Flores, agtawen iti limapulo ket tallo, naasawaan, awanan ti trabaho; Emely Riguera Adame, agtawen iti uppat a pulo ket pito, naasawaan, garbage collector; ken maysa a menor de edad.
Insayangkat dagiti kameng ti Vigan City Police Station ti anti-illegal gambling operation a gappuanan ti pannakakemmeg dagiti suspek ta naaktoanda a nagay-ayam ti tong-its.
Naala kadakuada iti maysa a kayo a lamisaan, tallo a piraso iti plastic monoblock a tugaw, maysa a piraso iti table mat, maysa a set iti baraha ken pusta nga aggatad iti duagasut walopulo ket tallo.
Naipan dagiti suspek iti City Health Office para iti Medico-legal examination ngem insigida met la a naipan ti kustodiya iti Vigan City Police Station para iti dokumentasyonda para iti maipila a kaso kontra kadakuada.
