VIGAN CITY – Kaso nga unjust vexation ken grave threat ti sangwen dagiti dua a lalaki ta pinagsawsaw-anda ti maysa a babai idiay Magsaysay District, Santa.
Nabigbig dagiti suspek a da Jevy Boy Borje, agtawen ti tallopulo nga agnaed iti Namalangan ken ni Mark Jasper Borje, agtawen ti duapulo ket dua nga agnaed iti Magsaysay District idinto a ti biktima ket ni Josefina Billena, agtawen ti limapulo ket siam nga agnaed met laeng iti Magsaysay District.
Ur-urayen ti biktima ti asawana a mangsundo kenkuana idin ta dimteng dagiti nabartek a suspek a nakaiggem ti kayo nga isu ti inlayatda kenkuana ken pinagsawsaw-anda iti dakes a balikas.
Gapu iti dayta, nagpatulong ti biktima kadagiti pannakabagi ti linteg agingga di nakemmeg dagiti suspek a tattan ket addadan iti Santa Police Station tapno dumalanda iti usto a proseso.
