VIGAN CITY – Dua a drayber ken maysa a backrider ti nadunor iti panagdinnungpar ti dua a motorsiklo idiay Barangay Sagayaden, Cabugao a nakairamanan ti dua a motorsiklo.
Ti Yamaha Nmax ket minaneho ni Zandro Tica Peria, agtawen iti tallopulo ket siam, agnaed iti Barangay San Pablo, Sto. Domingo.
Kabayatanna, ti met nagmaneho iti Rusi motorcycle ket ni Dennis Alcausin Fabro, agtawen iti tallopulo ket lima, agnaed iti Barangay Dardarat, Cabugao kaduana ti backride-na a ni Allan Sajor Cabasa, agtawen iti tallopulo ket tallo, agnaed iti Barangay Quezon, Cabugao.
Iti pannaki-uman ti Bombo Radyo Vigan ken ni Police Major Juan Jhayr Maggay, agpapaabagatan a direksyon ti NMAX idin ta ti Rusi ket sumrek iti highway a naggapu iti gasolinaan manipud iti daya a direksyon ket napasamak ti panagdinnungpar dagiti dua a motorsiklo.
Gapu dayta, nadunor ti dua a drayber ken nadunor pay ti akin-kannawan a saka ti nagmaneho iti Rusi motorcycle.
Awan ti accessory lights ti Rusi ken natakuatan pay a ti nagmaneho ket nakainom iti arak.
Nadadael met ti flaring iti sangwanan a paset ti YAMAHA NMAX idinto a nadadael met ti rear fender ti Rusi.
