VIGAN CITY – Nadunor ti ulo ken nagasgasan ti nadumaduma a paset ti bagi dagiti dua a drayber idinto a maysa a backrider ti nadunor iti paset ti kidayna ken nagasgasan met laeng iti nadumaduma a paset ti bagina gapu ti aksidente a nakairamanan ti dua a motorsiklo idiay Barangay Baclig, Cabugao.
Ti Yamaha Mio Soul 125 a motorsiklo ket minaneho ni Jefferson Rodriguez, agtawen iti tallopulo ket walo a taga-Barangay Baclig, Cabugao idinto a ti Suzuki Raider 150 ket minaneho ni Renejed Fajardo, agtawen iti sangapulo ket innem a taga-Barangay Rizal, Cabugao ken backrider-na ni Cloyd John Elias, agtawen iti sangapulo ket lima nga agpada a taga-Barangay Labnig West, San Juan.
Agpapadaya a direksyon ti Suzuki Raider idin ta ti Yamaha Mio nga aggapu iti amianan a paset iti kalsada partikular iti Petron Gasoline station ket simrek iti provincial road a gapuanan ti panagdinnungparda.
Naipaagas iti ospital dagiti karaman iti aksidente para ti naan-anay a pannakatamingda.
