VIGAN CITY – Maysa ti natay ken maysa ti matamtaming ti ospital iti napasamak nga aksidente idiay Brgy. Poblacion West, San Ildefonso.
Nabigbig ti pimmusay a ni Aaron Mendoza Nolasco agtawen ti dua pulo ket maysa ken agnaed ti Brgy. Paratong, Narvacan a nakalugan ti Yamaha NMax a nangisit ken matamtaming ni Robert Rabang Casabar agtawen ti tallo pulo ket lima agnaed ti Brgy. Cabuloan, Sta. Catalina a nakalugan ti Honda TMX 155 a motorsiklo.
Segun ti San Ildefonso Municipal Police Station, agpapaabagatan a direksyon ti YAMAHA Nmax a minenho ni Nolasco nga adda ti impluwensya ti arak a napaspas iti tarayna kadduana ti convoy na idi makadanun ti nakapasamakan ti aksidente saan a nakontrol ti driver ti manibela a puon iti pannakaipanna ti bangir a linya ti kalsada ken naidungpar ti motorsiklo ni Casabar nga agpapaamyanan a direksyon.
Nagsagaba iti dunor ti nadumaduma a paset ti bagina ni Nolasco a naipan ti Northside Doctors Hospital ngem naideklara a dead on arrival babaen kenni Dr. Marinela Vitamog ken kabayatanna ti driver ti TMX ken matamtaming idiay Metro Vigan Cooperative Hospital.
