VIGAN CITY – Naipaagas dagiti dua a lalaki a naaksidente idiay Tikeng River, Barangay Poblacion, Quirino.
Nabigbig dagiti karaman iti aksidente a ni Alex Dagwasi, agtawen iti uppat a pulo ket siam a taga-Barangay Namitpit, Quirino, drayber iti white and black Yamaha Mio Soul scooter nga awan iti plakana ken ni Harley Sang-ag, agtawen iti duapulo ket innem, awan ti driver’s license-na a taga-Barangay Cayus iti nasao nga ili, drayber iti Honda XRM 125 a motorsiklo.
Iti pakauna nga imbestigasyon, agturong iti abagatan a daya a direksyon ti Yamaha Mio ken nagpakannigid a napan iti Abalos Repair Shop idin ta naidungpar iti nakasinnabetna a napaspas ti tarayna nga XRM motorcycle.
Gapu dayta, nagasgasan ti nadumaduma a paset ti bagi ti drayber ti Yamaha Mio Soul idinto a ti drayber ti Honda XRM ket nagasgasan met ti akin-kannigid a luppona.
Naipaagas dagiti dua a drayber iti Quirino Primary Health Care Facility para ti naan-anay a pannakatamingda.
