Awan pay laeng ti pamalpalatpatan ti Abra Police Provincial Office no ania ti rason iti pannakapaltog ti dati a mayor idi kalman idiay Dangdangla, Bangued, Abra.
Nabigbig ti biktima a ni Jendricks Seares Luna, agtawen iti limapulo ket uppat, agnaed iti nasao a lugar, dati a mayor iti ili ti Lagayan.
Iti pannaki-uman ti Bombo Radyo ken ni PLTCOL. Daniel Pel-ey, Public Information Officer ti Abra PPO, makaaw-awat ti biktima iti pangta iti biag isu amanarimaan ti naun-uneg a panangimbestigarda agraman ti panangkitada kadagiti CCTV.
Maipalagip a ti biktima ket napaltugan iti sangwanan iti pagtaenganna babaen kadagiti suspek a naka-facemask, hood, ken kallugong a dagitoy ket naglugan iti dua a motorsiklo.
Nagsagaba iti tama ti paltog ti nadumaduma a paset ti bagina, ken naitaray iti ospital ngem saanen a nakalasat.
Naala manipud iti nakapasamakan ti pammaltog ti duapulo ket walo a basyo ti caliber .56 ken walo a basyo ti caliber 45.
Ti biktima ket limmaban a para bokal iti segundo distrito ti Abra idi May 12 midterm elections ngem saan a nangabak.
Kabayatanna, iberberipika dagiti pannakabagi ti linteg dagiti dua a motorsiklo a nasarakanda idiay Barangay Casili ta amangan no isu dagitoy ti inaramat dagiti suspek.
