VIGAN CITY – Natuntonen ti Vigan City Police Station dagiti dua a Raider a motorsiklo nga intaray dagiti menor de edad nga agtawen iti sangapulo ket uppat ken sangapulo ket innem, agpada a taga-Barangay Callaguip, Caoayan.
Iti pannaki-uman ti Bombo Radyo Vigan ken ni PLTCOL Rogelio Remiendo Jr., apaman a maidanun kadakuada ti pasamak ket imbilinna ti panangkamat kadagiti nangitaray kadagiti motorsiklo ta basar iti CCTV, makita a linuganan daytoy dagiti dua a nakuttong a lallaki.
Nalapdan dagiti kapulisan dagiti suspek idiay Salindeg, Vigan City ket narekobre dagiti motorsiklo a pinagsisinnukatda pay iti fairings-na.
Nupay kasta, isagsaganan dagiti pannakabagi ti linteg dagiti dokumento para iti regular filing.
Immuna a napukaw ti motorsiklo ni Sherwin James Ardaniel Biñan, agtawen iti duapulo ket tallo, security guard, tubo iti Isit, Dolores, Abra, ngem aggigyan idiay Barangay II, Vigan City.
Segun ken ni Biñan, alas syete iti rabii ti Mayo 24 idi imparking ni Biñan ti Suzuki Raider FI iti nasao a lugar sa napan iti Hotel Luna Annex building tapno mapan agtrabaho kas gwardya.
Idi nalpas ti trabahona iti alas syete iti agsapa ti May 25, sinublina ti lugar a nangiparkinganna ti motorsiklona ngem natakuatannan a mapukpukaw.
Ti maysa pay a motorsiklo ket kukua ni Dongliteos Pungtilan Lomboy, agtawen iti duapulo ket siam, truck driver, taga-Sitio 2, Barangay 13 Baay, Batac City, Ilocos Norte.
Alas singko bainte iti malem ti May 26 idi nagturong ti biktima iti Vigan City Police Station a nangireport a mapukpukaw ti motorsiklona a black Suzuki Raider.
Alas dyes iti rabii ti May 25 ket imparkingna ti motorsiklona idiay Encarnacion Streetm Barangay V, Vigan City ket iti kabigatanna, natakuatannan a mapukpukaw.
