VIGAN CITY – Dua a mangngalap iti naisalakan itattay bigat idiay Bgry. Villa Quirino, San Esteban, Ilocos Sur.
Iti pannaki-uman ti Bombo Radyo Vigan ken ni PSSg. Carlo Barcena a Chief Investigator iti San Esteban Municipal Police Station, dagiti nasao a mangngalap ket nabigbig a da William Ramos Dela Rosa, agtawen ti tallopulo ket uppat, baro ken ni Gilbert Saldi Retes, agtawen ti tallopulo ket maysa, naasawaan nga agpada nga agnaed idiay Brgy. Paratong, Sta. Lucia.
Segun ken ni Barcena, nagmalfunction ti makina ti bangka bayat ti kadda dagiti mangngalap iti nasao a lugar idin nauram isu a timpwakda ket nagkapetda laengen ti dadduma a paset ti bangka.
Nagsagaba ni Dela Rosa ti first-degree burn iti rupana idinto a saan a naan-ano ni Retes.
Inlawlawag ni Barcena a nairana a limmabas ti fishing vessel a Shanelle 1 a gappuanan ti panakakitada kadagiti mangngalap isu nga inalawda ket nagsanglad ti vessel idiay San Esteban Port.
