Dua a mangngalap, naalaw iti kabaybayan a sakupen ti ili a Sta. Maria

VIGAN CITY – Natalgeden ti kasasaad dagiti dua a mangngalap a naalaw idiay Barangay Bia-o, Sta. Maria.

Nabigbig dagiti mangngalap a da Reniel Amon Sarmiento, agtawen iti duapulo ket walo ken ni Jomar Janzain Ringor, agtawen iti duapulo ket tallo, agpada a taga-Barangay Dili, Sta. Cruz.

Nagresponde dagiti kameng ti Sta. Maria Police Station ken ti Municipal Disaster Risk Reduction Management Councuil iti report ni Barangay Kagawad Engelbert Lagmay nga adda dua a mangngalap a nadadaelan iti bangka a linugananda dua a milya ti kaadayona manipud iti igid ti kabaybayan.

Ipaypayapay dagiti mangngalap ti paggaodda ket nakita ida dagiti residente isu napanda inalaw iti katengngaan ti kabaybayan.