VIGAN CITY – Naalaw iti kabaybayan ti Barangay Nalvo, Sta Maria dagiti mangngalap a da Rey Hugo, agtawen iti uppat a pulo ket lima ken ni Rommel Catabay, agtawen iti uppat a pulo ket dua nga agpada a taga-Barangay Concordia, Bolinao, Pangasinan.
Iti pannaki-uman ti Bombo Radyo Vigan ken ni PCapt. Joel Dasargo, nagpataaw dagiti mangngalap idi March 4 ket nagpatpatnagda ta intuloyda pay laeng ti nagkalap iti kabigatanna.
Alauna iti parbangon ti March 5, naiturog dagiti mangngalap iti uneg ti bangkada isu a saanda a napuotan ti cargo ship, ta idi mangngegda ti ungorna ket asidegen iti bangkada isu a saandan a nalisyan ket dinalapus ti cargo ship ti bangkada.
Gapu dayta, limned ti maysa a bangkada idinto a ti maysa a timpaw ket isu ti nagkapkaptanda agingga a nasarakan ken naalaw ida dagiti taga-Barangay Nalvo a napan met laeng nagkalap iti alas otso idi kalman, March 6.
