VIGAN CITY – Dua ti nadunor iti napasamak a panagdinnungpar ti dua a lugan iti national highway iti Brgy Cameztisoan, Sto Domingo.
Dagiti karaman iti insidente ti maysa a Honda a color black a minaneho ni Kim Andrei Yvonne Regucera, agtawen ti duapulo, baro, college student, addaan ti lisensya, ken agnaed idiay Brgy. San Ramon, Magsingal idinto a ti nagmaneho ti Isuzu Crosswind color gray ket ni Mckinley John Tabarangao Rumias, agtawen ti duapulo, baro, licensed professional driver kaduana ni Alvin Vael Aglibot, agtawen ti sangapulo ket walo, agpada nga agnaed idiay Brgy. Panay Norte, Magsingal.
Agpapaamianan a direksyon ni Regucera idinto nga aggapu iti bangir a direksyon ni Rumias ngem idi nadanonda iti nasao a lugar kangrunaan iti agsikko a paset iti kalsada, immagaw ti linya ni Regucera isu a naidungpar iti manmanehoen ni Rumias.
Gapu ti pasamak ket nagsagaba ti dunor ni Regucera isu a naipan iti Tolentino Clinic and Hospital para iti pannakatamingna idinto a nagsagaba laeng ti minor injuries da Rumias ken Aglibot isu a naipanda iti Northside Doctors Hospital para ti pannakatamingda.
Kabayatanna, agpada a naapektaran dagiti lugan ngem saan pay nga ammo nu mano ti gatad iti naapektatan.
