VIGAN CITY – Kiddaw dagiti healthcare worker iti Ilocos Sur iti dua a lawas a “timeout” babaen iti pannakaidalan ti Enhanced Community Quarantine iti probinsia gapu iti agtultuloy a panagado iti kaso ti covid-19.
Segun ken ni Dr. Jun Tagorda a Presidente iti Ilocos Sur Medical Society, napagnunumwanda kaduada dagiti kameng ti Southern Ilocos Sur Medical Society, Municipal Health Officers, Philippine Nurses Association–Ilocos Sur, Philippine Hospital Association – Ilocos Sur Chapter, Private Hospitals Association ken dadduma pay a grupo dagiti doktor iti panangkiddaw iti Provincial Government of Ilocos Sur iti 14-day time-out tapno mapababa iti kaso ti covid-19.
Nabannog, kurang ken arigna agsakiten dagiti health care workers gapu iti umad-adu latta a kaso kasta payen a mapunpunnon dagiti ospital iti covid-19 patients.
Inyunay-unayna a kasapulanda met iti inana tapno maitedda a nasayaat iti salaknib a kasapulan dagiti naapektaran iti virus.
Nupay kasta ket numan bilang mapatgan iti kiddawda sigurdoenna a bayat ti pannakaipatungpal ti lockdown ket agtultuloy latta iti panagtrabahoda.
Kabayatanna, pinasingkedan ni Dr. Trina Tabboga Talaga a Chief of hospital iti Ilocos Sur Provincial Hospital Gabriela Silang a manarimaan pay laeng iti panang-evaluate ken panagadal iti kiddaw a timeout isu a kiddawna iti pananguray laeng dagiti umili iti nasao nga addang.
Iti agdama, agtaltalinaed a General Community Quarantine with heightened restrictions iti probinsia.
